MATHAI SWIMANI KOTHOMA
Jisu achaimani bosong
Jisu khristo achaimani
13. Aphuru Jisu Galilini Jordano thang kha, hake baptisma wngna hwnwi Johonni thani phai kha. 14. Johon bono kiphil rwna nai kha. "Ang se nwng bai baptisma wng thai bla ! Hai twtwi bahai khe nwng ani thani phai ?" hwnwi bo sakha.
12. Johonno jelo klai kha hwnwi khna khe Jisu Galilio thang kha.
Jolimani kokno twwi phrwngmani
31. " 'Khoroksa swk bini bihikno kak khe kaksen swi ma rwnai,' hwnwi sajakmani o kok bo tongo.
38. ''' ' Mokolni bodla mokol, bua ni bodla bua,' hwnwi sajakmani o kokno norok khna kha.
29. Hai phano ang norokno o kok sao, Solomon jolma jolsa gwnang phano omorokni barsani sai se aswk naithokgwi man lang ya.
30. Charani jabra -tini tong khe khwna kwrwi,thapao sokjaknai-abono se Kaitor aswk naithok rwi ton khe bo norokno naithok rigwlak diba? Norok bwswkbse poito kisa gwja !
31. Abo baino tamo no chanai, tamnono nwngnai,tamono kannai chumnai abono ta wana di.
32. ( Poito kwrwirekno omorokno manna naio. ) Omorok bebak norokni samung nango hwnwi chuknohani norokni Pha sai mano.
33. Tamo khe bini ha ni bagwi se wansuk gra di, bo naima twino tongna bagwi se wansuk gra di ; hake bo norokno aswk manwi rokno rw anw.
34. Aabo bai no khwnani bagwi ta wana di khwnani khwna wansukjak anw. Tini tangmani tinini wngo."
Buino majra ta ber di
( Luk 6. 37-38, 41-42 )
7. "Kaitor norokno majra ber ya twi khe norok buino majra ta ber di,
2. tamoni hwnkhe norok buino majra ber twi no Kaitorbo norokno majra ber nai. Norok buino khwlai twino Kaitorbo norokno abo hai khlainai.
3. Hake tamoni nini takhukni mokolo buphang biphiring tongma simi nwng nuk ? Nini mokolni buphang bokocho le tamoni nuk ya sla ?
4. Nini mokolo buphang bokocho tong twtwi nwng bahai khe nini takhukno 'Phai di, nini mokolni buphang biphiring tikhlai gra na, ' hwnwi sarak de ?
5. O phatra, nini mokolni buphang bokocho tikhlai gra di, hake nini takhukni buphang biphiring kaham khe nuk anw ; aphuru nwng tikhlai man anw.
6. "Swirokno manwi kwtharno ta rwdi-rw khe bohrok kiphilwi se norokno riphirik phir anw ; norokni muktanobo wakrokni bwskango ta rw di-rw khe bohrok abohrokno ka simi se kadul anw."
San di,naituk di, dugar bu di
( Luk 11.9-13 )
7. "San di, norok mannai ; naituk di, hake norok nuknai ; dugar bu di, hakke norok phiyokgwi rwjak nai.
8. Tamon hwnkhe sannai borokbo mano, naitoknai borokbo nugo, dugar bunai borokbo phiyokgwi rwjakgo.
9. Bwsa ruti san khe holongsiki rwnai abo twi bupha norokni bisingo sabo tong ?
10. Eba khe a san khe chibuk rwnai sabo tong ?
11. Norok aswk hamya twtwi se norokni bwsarokno manwi kahano rwna siui tongo. Hake chuknohani norokni Phani thani sannairokno bo manwi kaham rwnai o kok bwswk se kubui !
12. "Norok bui bai khlaijakna muchung twi norokbo buino khlai di : o kok khe Musini Kerong bai diarirok phrwngmma kok se."
Dugar kesep
( Luk 13.24 )
13. "Dugar kesep twi hab di, tamoni hwn khe morke lamani dugar wng kha kuar, lamabo kotor, hake borok kwbangmano abo twi himo.
14. Thangnani lamani dugar wng kha kesep, lamabo kutuk, hake kisa bororokno abono sai mano."
Bwthai baino buphang sinijago
( Luk 6. 43-44 )
15. "Diari phatrarok bai hus khe tong di ; bohrok saka saka mera hai khe norokni thani phaio, phiya kha bisingo le bohrok thamchi kutung geguma hai se.
16. Bohrokni samung baino noro bohrokno sini anw. Busulwngo angur thai ya, raisoklwngobo khwichang thai ya.
17. Buphang kaham bwthai kaham thaio, buphang hamyabo bwthai hamya thaio.
18. Buphang kaham khe bwthai hamya thai man ya ; buphang hamyabo bwthai kaham thai man ya.
19. Bwthai kaham thai ya buphang khe tanwi horo khiklai sokjago.
20. Hake abo baino norokbo diari phatrarokno bohrokni samung bai no sini anw."
Ang norokno si se sini ya
( Luk 13. 25-27 )
21. "Ano subrai,Subrai !' hwnnairok bohrok bebakno Kairotni hao habwi manglak tamo khe chuknohani Aphani muchung twi tongnairok simi se habwi man anw.
22. A salo borok kwbangmano ano hai hwnwi hwn anw, 'Subrai, Subrai ! Nini mungwi chwng Kaitorni kok sakha, nini mung bai chwng mwtai hamya kwbangmano brwkhlai kha, nini mung bai wanama singcha samung kwbangmano khlai kha !'
23. Ang aphuru khe bohrokno hai hwnwi sa anw, 'Ang norokno si se sini ya. Ani oroni thang di,chengtarok !' "
Nok tangnai khoroknwirok
( Luk 6. 47-49 )
24. "Hake tabuk, ani o kokrok khaui abo haino tongnai borok bo holongdap saka nok tangnai sian kwrwng borok hai.
25. Uatwi lukhlai kha, twisa rokbo phai kha, hai phano a nok bai liya, abo holongdap saka tangjak.
26. "Phiya ani o kokrok khnaui abo hai tongya borok bo hasingcha saka nok tangnai sian kwrwi borok hai.
27. Uatwi lukhlai kha, twisarokbo lom kha, nobar kotobo phai kha. A nok baimani bwswk kha korom rere."
Jisu suar gwnang khe phrwngo
28. Jisu omorokno sa bai khe lukurok bo phrwngmano uana jak kha.
29. Bo bohrokni Kerong phrwngnairok hai phrwngya, suar gwnang khe se phrwngo.
Biadi chajakno Jisu ham rwmani
( Mark 1. 40-45 ; Luk 5. 12-16 )
8. Jisu hataini ongkhorwi phai khe luku kwbangma bono rwkthar kha.
2. Aphuru biadi chajak khoroksa bini thani phai yasku sungwi hai hwnwi sa kha, "Hodasa, nwng ano ham rwna khe ham rwi mano."
3. Jisu yak phologwi bono tangwi "Ham di, ang naio," hwnwi sa kha. Hai klheno doropsa bini biadi ham kha.
4. JIsu bono hai hwnwi sa kha, "Khna di, o kokno kebono ta sadi. Thang di, ochaino thangwi phunugwi di. Nwng tabuk ham kha hwnwi lukuno phunukna bagwi Musi rathar di hwnwi dagima haino ratharwi di,"
Romni sengkrak okrani selengno Jisu ham rwmani
( Luk 7. 1-10 )
5. Jisu kapharnaumo hab khe Rumni sengkra okra khoroksa bo bai malai bono hai hwnwi koi kha,
6. "Hodasa ani seleng nogo Hamya kwlai jak, kisa phano bachai man ya belai khe kwlai tong kha."
7. "Ang thangwi bono ham rwi anw," hwnwi Jisu sa kha.
8. Sengkrak okra hai hwnwi sa kha, "Ihi, hodasa, ani nogo nono kasa rwna chuk ya. Nwng hwn kheno ani seleng ham anw.
9. Angbo bokhorok khoroksani yago, ani yagobo sengkrak tongo. Ang khoroksano 'Thang di !' hwn khe bo thango, tei khoroksano 'Phai di !' hwn khe bo phai o, ani selengnobo 'Omono khwlai di !' hwn khe bo abono khwlaio.'
10. O kok khwnaui Jisu uanajjak kha, bono rwktharnairokno bo hai hwnwi sa kha, "Norokno ang o kok sao' Israilrokni bisingo phano bo hai poito gwnang borok ang nuk ya kho.
11. Ang norokno o kok sao, borok kwbangma sal kabaini sal thangbaini phawi Kaitorni hao Abraham Isak tei Jakob bai baksa achugwi cha lai anw ;
12. a hao tongna hwnnairok khe phatarni mwnakmao khiklai rwjak anw."
13. Hake Jisu sengkrak okrano hai hwnwi sa kha, "Nogo thang di, nwng poito khwlai twino nini bagwi khwlaijak anw."
Hake a sengkrak okrani seleng aphuruno ham kha.
Borok kwbangmano Jisu ham rwmani
( Mark 1.29-34 ; Luk 4.38-41 )
14. Jisu Pitorni nogo thang kha, bo aro pitorni bwkrajwkno lumui klai tongma nuk kha.
15. Bo bini yak tang kha ; hake bo bachaui bono char rwkha khan rwkha.
16. Sanja klai kheno bororok mwwtai hamya kolopjakrok kwbangmano Jisuni thani tubu kha. Hake Jisu kok thaisa baino mwtai hamya rokn rwkhlai kha,bebak hamya roknobo ham rwkha.
17. Bo sakphangno chini hamyano hor kha, chini bemukrok rujui twlang kha, hwnwi Jisaia diari sa langmani abo nang phaina bagwi se omo wngo.
Jisuni logi tongna nainairok
( Luk 9.57-62 )
18. Jisu luku kwbangmano bono chorsa khe kuthumma nugwi bini sagri rokno lekni ayangnaro thangna hwnwi dagi kha.
19. Kerong phrwngnai khoroksa bini thani phawi hai hwnwi sa kha, "Hodakra, nwng thang thanio ang thangna gosio."
20. Jisu bono hai hwnwi sa kha, "Sialni hakor tongo, toksa- toktwirokni bothop tongo, Borokni Sajlani le kwrwngsa phano bokhorok bomna se kwrwi."
21. Tei khroksa sagri hai hwnwi sa kha, "Hodakra, swkang aphano phobwi rwi grana,"
22. Jisu hai hwnwi sa kha, " Nwng ani logi phai di, kwthwi bai kwthwino phob lai thung."
Jisu nobar kotor thak rwmani
( Mark 4.35-41 ; Luk 8.22-25 )
23. Jisu rungo ka kha, bini sagrirokbo bini logi thang kha.
24. Achomsa leko nobar kotor sibcha khe rungo twi aphal pung phai kha. Aphuru Jisu thui tongo,
25. Sagri rok bini thani thangwi bono socha lai "Subrai, chwngno mwthang di, chwng thwina nai tong lai kha !" hwnw sa kha.
26. "Norok tamoni bagwi aswk kirijak ? Norokni poito tamoswk kisa gwja !" hwnwi Jisu hwn kha. Hake bo bachaui nobar bai twino damrogwi rwkheno bebak kwchag kwchang wng kha.
27. Bebakno buanajakbai kha. "Omo bubo twi borok hwno ? Nobar rok bai twirok suda bini kok khnai ma tongo !" hwnwi bohrok salai kha.
Jisu mwtai hamya kolopjak khoroknwino ham rwmani
(Mark 5.1-20 ; Luk 8. 26.39 )
28. Jisu lek ayang narni Gadara amchoio phai khe simalwngni ongkhorwi phainai borok khoroknwi bini thani sok phai kha. Bohrok mwtai hamya kolopjak, bohrok belai kirimasingcha, aboni bagwi khoroksa phano a lama twi himrakya.
29. Logi logi no bohrok hai hwnwi chirikhok kha. "O Kaitorni sajla, nwng chwng bai tamo nangjak ? Mol sokphai ya sini no da nwng chwngo satokna phai ?"
30. Aro wak kwbangma ada chai tong mani, abo bai kwbang chal thaya
31. "Nwng chwgno rwkhwlaina khe u wak dolo chwngno rohor jadi," hwnwi mwtai hamya rok Jisuno koi kha.
32. "Thang di," hwnwi Jisu bohrokno hwnkha. Hake bohrok ongkhorwi wak rokni bisingo thangwi habwi kha. Hake aswk wak bebakno harwbra twi ongkhor klaiwi leko kwlwkgwi thwi bai kha.
33. Wak mwrwknairok kharwi tauno thang lai kha, hake bebak kokno khupurwi sai bai kha, a mwtai hamya kolopjak rok tamo wng kha a kokno bo sai bai kha.
34. Aboni bagwi taunni masa krwitwi Jisu bai malai na hwnwi thang kha. Bohrok bo bai malai khe bono norokni amchoini ongkhorwi thang di hwnwi koi kha.
Yakung yak manyano Jisu ham rwmani
( Mark 2. 1-12 ; Luk 5. 17-26 )
9. Jisu rungo kasai lek lawi bini tauno kiphilwi phai kha.
2. Borok maknwi maktham wayingo khe yakun yak manya khoroksano balwi bini thani tubui phai kha. Bohrok aswk poito khwlai mano nukgwi Jisu a yakung yak maya no "Ta wana di, chwlasa. Nini sumsok nakar jak kha." hwnwi sa kha.
3. Hake kerong phrwngnairok baksa kha bising bising hai hwnwi wansuk lai kha, "O borok ba Kaitorno se hamya sa bla !"
4. Bohrok wansukma kok no Jisu sai manwi hai hwnwi sa kha, "Tamo wngwi norok omo hai kok hamya wansuk lai ?
5. 'Nini sumsok nakarjak kha,' hwnwi sana da lai kuk, eba khe 'Bachai him gra di,' hwnwi sana da lai kuk ?
6. Hake o swngcharo borokni Sajla sumsok nakarwi mano abono ang norokno phunuk anw." Hake Jisu a yakung yak manyano "Bacha di, nini uaing khochai nogo thang di !" hwnwi sa kha.
7. A borok bachai nogo thang kha.
8. Abono nugui bororok kirijak bai kha, Kaitor bororokno omo twi phan rwma bai bohrok Kaitorno lob lai kha.
Jisu Mathaino ringmani
( Mark 2. 1-17 ; Luk 5. 27-32 )
9. Jisu aroni kutulwi thang kha, hake him te him te Mathai hwnwi teks romnai khoroksano bini ophicho achugwi tongma nugwi kha. "Ani logi phai di, " hwnwi Jisu bono sa kha.
Hake Mathai bwchaui bini logi thang kha.
10. Mathaini nogo Jisu maichai tong phuru teks romnairok bai basijak borok kwbangma bo bai tei bini sagrirok bai baksa cha thani achuk phai kha.
11. Maknwi maktham Pharisairok abono nugwi bini sagrirokno hai hwnwi swng kha, "Norokni Hodakra tamo wngwi teks romnairok bai tei basijakrok bai chalai nwnglai klai sala ?"
12. Jisu bohrokni kok khnaui hai hwnwi sa kha, "Kahamni doctor nangya, hamyani se nango.
13. 'Ang pun tok nai ya, Khairokma se naio, 'hwnwi Elembakni o kok tamo hwnwi sa kha thangwi nai di. Borom gwnangrokno ang ringna phai ya, basijakrokno se ringna phaio."
Ubasni kok swngmani
( Mark 2. 18-22 ; Luk 5. 33-39 )
14. Aphuru baptisma rwnai Johonni sagrirok phaiwi Jisuno hai hwnwi swng kha, "Chwng bai pharisairok ba tamo wngwi ubas tong tong lai sla ? Nini sagrirok le kisa phano tong ya sla ?"
15. isu hai hwnwi sa kha, "Kaijaknaisa logi tong twtwi kailabari phainai rok mogwi tong anw hwnwi da norok kha ka ? Ihi, ahai ya ! Tamo khe omo twi sal phai anw, kaijaknaisa bohrok bai swkagwi twlangjak anw, aphuru khe bohrok cha yaui ma tong anw.
16. 'Ri kwchamo khoroksa phano ri kwtal thab ya ; omo twi khe thabmani abo ri kwchamno teibo kichik rwi bwlam war rwnai.
17. Eba khe khoroksa phano angur bwtwi kwtalno twk mosonjago ton ya ; ton khe a twk rechek rachak wngnai, hake bwtwi bo kwsarnai, twkbo bainai. Tmo khe angur bwtwi kwtalno twk kwtalono tono, hake kwnwi nwino kaham tong anw."
Hodani bwsajwk bai Jisuni dulai tangnaijwk
( Mark 5. 21-43 ; Luk 8. 40-56 )
18. Jisu o kokno bohrokno sai tong phuru hoda khoroksa phawi yasku sungwi hai hwnwi sa kha, "Angsajwk tabukno thwi drop. Phai di, nwng bini sago yak bera kheno bo thangsanai."
19. Hake Jisu bachaui bini logi thang kha, bini sagrirokbo bo bai baksa thang kha.
20. Bwrwima khoroksa nokha bisi chiknwi wng kha ri suma thak ya, bo uklok twi phawi Jisuni dulai buchuk tangwi rw phai kha.
21. "Ang bini dulai buchuk tang kheno hamnai." hwhwi bo kha bising bising wansuk kha.
22. Jisu uphilwi bono naisingwi hai hwnwi sa kha, "Bwrwima ta wana di. Nini poito nono ham rwkha." Aphuruno a bwrwima ham kha.
23. Hake Jisui a hodani nogo thang kha. Kwthwini tamnairokno tei bebak borokno kutuk lai jak nugwi
24. bo hai hwnwi sa kha, "Jotono ongkhorwi thang bai di ! O cherai thwi ya - bo thui swe tongo !"
Bui bebakno bono mwnwi bai kha.
25. A bororokno tikhlai rw bai kheno a cherai tongma nogo Jisu habwi bini yak romwi kha, hai kheno a cherai bwcha kha.
26. O kok a ha gwnangwi pirjak kha.
Mokol phula khoroknwino Jisu nuk rwmani
27. Jisu aroni kutulwi thang kha, hake himwi tong phuru mokol phula khoroknwi bono rwkthar lai kha. "O Daudni Bwsla, chwngno khairok jabadi !" hwnwi bohrok chirik lai kha.
28. Jisu nogo thang kheno a mokol phula khoroknwino bini thani phai kha. "Ang omo hai khlai mano hwnwi norok poito da thang ?" hwnwi Jisu bohrokno swng kha.
"I, poito thango, hodasa," hwnwi bohrok sa kha.
29. Jisu aphuru khe bohrokni mokol tangwi "Norok poito thang twino wng thwng ! hwnwi sab kha,
30. hake bohrok mokol nuk kha. "O kokno khoroksano phano ta sa di," hwnwi Jisu bohrokno ragdama khe sa kha.
31. Bohrok thangwi Jisuni kok a ha gwnagwi pir kha.
Kok manya khoroksano Jisu ham rwmani
32. A borok khoroknwirok thang kheno maknwi maktham bororok mwtai hamya kolopjak kok man ya khoroksano Jisu ni thani tubu lai kha.
33. A mwtai hamya rw khlai jak kheno a borok kok sacha kha. Jotono wanajak bai kha. "Israilrokni bisingo omo hai chwng nukya kho," hwnwi bohrok sa lai kha.
34. Pharisairok khe "Mwtai hamyarokni bokhorok bai se bo mwtai hamyarokno rwkhlaio," hwnwi sa lai kha
Jisu lukuno hamjak mani
35. Jisu taunrokgo kami rogo thang kha. Bo bohrokni thumnokrogo bo phwrwng kha, Kaitorni hani kothoma kahambo pir kha, bebak bemuk gwnang hamya rokno bo ham rw kha.
36. Bo luku rokno nugwi belai khairokjak kha, tamoni hwnkhe mwrwknai kwrwi mera rok hai bohrok khairok susuk , piring poroi gwja.
37. Abo baino bo bini sagrirokno hai hwnwi sa kha, "Mai kwbangma munui tong kha, yang ranai se bang ya.
38. Abo baino bini ma rana bagwi 'Teibo borok rohor di,' hwnwi nophngsano san di."
Jisuni chonghor chiknwirok
( Mark 3.13-19 ; Luk 6. 12-16 )
10. Jisu bini sagri chiknwirokno kwrwngsa khe ringwi mwtai hamyarok rwkhlainani bai bebak bemuk gwnang hamyarokno ham rwnani phan rw kha.
2. Omorok wng kha a sagri chiknwirokni bumung : swkang Simon ( bono Pitor hwno ) tei bini takhuk Andria ; Jakob bai bini takhuk Johon, bohrok wng kha Sebedaini bwsarok ;
3. Philip tei Bartholomai, Thoma teks romnai Mathai ; Alphaini bwsla Jakob tei Thadia ;
4. Kwsrang Simon, hwn khe Jisuno romrwnai Juda Iskariot.
Chonghor chiknwirokno pirna rohor mani
( Mark 6. 7-13 ; Luk 9. 1-6 )
5. Jisu o chiknwrokno hai hwnwi sai rohor kha, "Buini bororokni hao tei Samariarokni taun khungsao phano ta thang di,
6. mera kwmajak hai Israirokni thani se thang di.
7. Kaitorni ha sampa kha hwnwi thangwi pirwi di.
8. Ham ya no ham rw di, kwthwino mwthangwi di, biadi chajakno ham rw di, mwtai hamyano rwkhlai di. Norok magna manmani, magnano rwdi.
9. Nini solao mungsa phano ta twi di, rangchak buya, rukphai buya, tamani rang buya ;
10. lamani bagwi bogol ta twi di, kamchwlwi kangsani bara ta twi di, yaklapbo ta twi di, raidang bo ta twi di. Samung tangnaisa bini chamung man thai klaio,
11. 'Norok taun khungsa swgo kami khungsa swgo sok phai khe aro habwi norokno nogo kasa rwna muchungnai abo twi borokno naituk di, hake aroni kutul ya sak a borok bai tong di.
12. Norok noksingo ma hab khe 'Kha kwchang di.' hwnwi hwn di.
13. A nokni bororok norokno yachak sok khe norok 'Kha kwchang di,' hwnmani a kok nang thung.
14. Phiya noksa swk phano taun khungsa swk phano norokno nogobo kwsa rwya khe, norokni kokbo khna ya khe, hake yakungni hadlwi buprai klangwi aroni thang di.
15. O kokno muitu narwk di, Jerani salo a taunni bororokni sai sodom bai Gumrani bororokno Kaitpr maya cha kuk anw."
Satokjaknani kok
( Mark 13. 9-13 ; Luk 21. 12-17 )
16. "Khna di, ang norok no geguma kholao merano rohor twi se rohoro. Norok chibuk hai hus gwnang wng di, pharuk hai kwchang kwchang wng di.
17. Hus khe tong di, bororok norokno khaui kuto twlang anw, thumnokrogo norokno swprak anw.
18. Gobor norrok bai bugrarok tei buini bororokno kothoma kaham sana bagwi norok gobornorrok bai bugrarokni bwskango ani bagwi buj thumna tubu jak anw.
19. Norok buj thumjak phuru tamono sanai bahai khe sanai abono ta wana di ; aphuru norok tamo sanai abo norokno sai rwjak anw.
20. Tamoni hwnkhe norok samani kok abo norok sagwlak ; abo norokni Phani Phola se norokni khuk twi sanai.
21. "Takhuk takhukno butharna bagwi rom rwi rohor anw, buphabo haino bwsano khlai anw ; bwsa-bwtwirokbo buma buphani ari wngwi bohrokno butharna rohor anw.
22. Ani bagwi bebak borok norokno naisle anw, tamo khe soi man suknai borok bo se mwwthangjaknai.
23. Bohrok taun khungsa swgo norokno satok khe tei khungsao kharwi thang di. Ang norokno o kok sao, Israilni bebak taunno norok samung khlai bai ya sinino Borokni Sajla Phainai,
24. "Phrwngnaini sai srwngnai tor ya ; selengbo nokphangni sai tor ya.
25. Abo baino srwngnaibo phrwngnai bai baksa wng kheno, selengbo nokphang bai baksa wng kheno kha kochom thai klaio. Nokphang Belsebul hwnjak khe bini nokni bororokbo bwswk se hamya hwnjak no !'
KAHAM
( Luk 3.23-38 )
1. Omo Jisu Khristo achaimani bosong, bo wng kha Daud bosongni,Daud wngkha kha Abraham bosongni.
2. Abraham wngkha Isakni bupha ; Isak Jakobni ; Jakob Juda tei bini takhuksongni ;
3. Juda Peres bai Serani (Tamar bohrokni buma) ; Peres Hesronni ; Hesron Ramni ;
4. Ram Aminadabni ; Aminadab Nasonni Nason Salmonni ;
5. Salmon Boasni (Rahab bini buma) ; Boas Obedni ; ( Rut bini buma ) ; Obed Jisaini ;
6. Jisai Bugra Daudni.
Daud wngkha Solomonni bupha (Bini buma agi Uriani bihik) ;
7. Salomon Rihoboamni ; Rihoboam Abiani ; Abia Asani;
8. Asa Jihosapatni ; Jihosapat Joramni ; Joram Usiani ;
9. Usia Jothamni ; Jotham Ahasni ; Ahas Hiskiani;
10. Hiskia Manasini ; Manasi Amonni ; Amon Josiani;
11. Josia Jikoma bai bini takhuksongni bupha, Israilrok Babilono twlangjak phuru bohrok tongo.
12. Israilrok Babilono twlangjak mani ulo ; Jikonia wngkha Sialtialni bupha ; Sialtial Serubabelni ;
13. Serubabel Abiudni ; Abiud Eliakimni ; Eliakim Asorni ;
14. Asor Sadokni ; Sadok Akhimni ; Akhim Eliudni;
15. Eliud Eliasarni ; Eliasar Mathanni ; Mathan Jakobni ;
16. Jakob Josepni ; Josep wngkha Mariamni bwsai ; Mariam wngkha Masia hwnjaknai Jisuni buma.
17. Omo twi khe Abrahamni simi Daud jora piri chibrwi kao, Daudni simi Israilrok Babilono twlangjakma jora piri chibrwi kao, phiya masia achaima jora piri chibrwi kao.
Jisu khristo achaimani
( Luk 2. 1-7 )
18. Jisu khristo achaimani kok khe ahai : bini buma Mariam Josepni kok swngjak,hai phano bohrok kaijak ya sinino phola kwthar bai bo sakderia wngmani sijak kha.
19. Bo bai kok swngjaknai Josep wngkha borok kaham,bo lukuni bwskango Mariamni mwkgang sokna muchungjakya,hake tepsa khe kok seplana hwnwi khao chap kha,
20. Bo omo hai wansukgwi tong phuru Subraini suari khoroksa imanjo nukjakgwi hai hwnwi sa phai kha, ''Daudni bosong Josep, Mariamno nini hik khwlai nani ta kiri di, bo phola kwthar bai se sakderia wngo.
21. Bo bwsa chwla masa banai, hake nwng bono Jisu hwnwi mung phar di, tamni hwnkhe bo bini bororokno bohrokni sumsokni yakni phiyok nai."
22. Subrai a diarini khuk twi hai hwnwi samani abo nang phaina bagwi omorok bebakni wngo,
23. "Bwrwi sikla masa sakderia wngwi bwsa chwla masa ba anw,hake bo Imanuel hwnjaknai"
(abo "Kaitor chwng bai baksa tongo" hwnmani se'.
24. Hake Josep thumani bachaui Subraini suari sama twino khwlai kha, bo Mariamno kaijak kha.
25. Hai phano bo bini bwsa chwlano ba ya sak bini sak tang liya. Hake Josep bono Jisu hwnwi mung phar kha.
Salkabaini phainairok
2. Herod bugra wngwi tong phuru Judia hani Betlehem tauno Jisu achaio. Bo achai khe no salkabaini maknwi maktham athukri nai lekhanairok Jerusalemo phaiwi
2. hai hwnwi swng phai kha, ""Judairokni bugra wngna hwnwi achainai a cherai buro wngkha ? Chwng salkabaio bini athukiri kama nuk kha, hake chwng bono khulumna phaio."
3. O kokno khna khe no bugra Herod uanajak kha, Jerusalemni joto borokbo uanajak kha.
4. Bo ochai okrarok bai Kerong phrwngnairok bebak no kwrwngsa khe ringwi "Masia buro achai no?" hwnwi swng kha.
5. Bohrok hai hwnwi sa kha, "Judiani Betlehem tauno achai nai. A diari hai hwnwi swi lang kha,
6. 'O haa Judiani Betlehem, nwng haa Judiani tei bokhorokrokni sai kisa phano kechen ya ; nini bising twi bokhorok khoroksa phai anw,
Bo ani borok Israilrokno chabwi twi anw. "'
7. Herod salkabaini phai nai rokno tepsa khe ringwi a athukiri bu phuru nukjak kha abono swngwi narwk kha.
8. Hake bo bohrokno hai hwnwi sai Betlemhemo rohor kha, "Thangdi, a cheraino kaham khe rutuk di. Norok bono nuk khe anobo sa phai di, hake angbo thangwi bono khulumwi anw."
9. O kokno khnai bohrok thang kha. Lamao bohrok salkabai o nuk mani a athukirino nuk phi kha ; abo a cherai tong thanio bathagwi ya sak bohrokni swkang swkang wngwi tong kha.
10. A athukiri no nugui bohrok bwswk se kha swrang kha, bwswk se tongthok kha !
11. Bohrok nok bisingo habwi a cheraino bini buma Mariam bai nuk kha. Bohrok yasku sungwi bono khulum kha, hake bohrok ni bokcha khengwi bono rangchak, satrai motom tei murbelengtwi hili rwkha.
12. Kaitor bohrokno imango "Herodni aro kiphilwi ta thang di," hwnwi sa kha, hake bohrok kubun lama twi bohrokni haao kiphilwi thang kha.
Josep bai Mariam Jisuno twwi Ijipo kharmani
13. bohrok thang bai khe imango Subraini suari khoroksa Josepno nukjakgwi hai hwnwi sakha, "Bacha di, cherai bai bumano twwi Ijipo khar di, ang kutul di hwnya sak nwng aro tong di. Herod o cherai no bwtharna hwnwi rutuk nai."
14. Hake Josep bachaui cherai bai bumano twwi horni bisingono Ijipo lam rwkha.
15. Herod thwi ya sak bo aro tong kha.
"Ang ani Sajlano Ijipni ring kha," hwnwi subrai bini diarini khuk twi samani abo nang phai na bagwi se omo wngo.
Cherairokno bwtharmani
16. A salkabaini phainairok bono bandi kwlang kha hwnwi sai man kheno Herod belai khe joli jak kha. A phainai rok bai sajakma haino a athukiri nuk jak mani mol romwi bo Betlehemni tei ganaginini bisiknwi tei bisiknwi pungya bebak chwla bwsa rokno bwthar di hwnwi dagi kha.
17. Omo twi kheno Jirimia diari hai hwnwi samani a kok nang phai kha ;
18. "Ramao khorang khna kha, chirimokrok bai kablaikonglai khna kha.
Rahel bwsarokni bagwi kabo,
Bo kap sini kabwi asiyokjak ya,
bohrok bebakno thwi bai kha ba,"
Josep bai Mariam Jisuno twwi Ijipai kiphilmani
19. Herod thwi bai khe Ijipo Subraini suari khoroksa Josepno imango nukjak phai kha,
20. hake hai hwnwi sakha , "Bacha di, cherai bai buma no twwi haa Israilo kiphil thang di ; o cheraino bwtharna nainai rok thwi bai kha,"
21. Hake Josep bachaui cherai bai buma no twwi haa Israilo kiphil thang kha.
22. Arkhelano bupha Herodni yakchuo haa Judiani bugra wngwi tongo hwnwi khnaui Josep aro thangwi tongwi nani kirijak kha. Bo imango teibo sajakma bai Galili amchoio thang kha,
23. hake Nasaret hwnwi taun khungsao tongwi kha. "Bo Nasaretsa hwnjaknai," hwnwi diari rok sama abo nang phai na bagwi se omo wngo.
Baptisma rwnai Johon pirmani
( Mark 1.1-8; Luk 3.1-8; Johon 1.19-28)
3. Aphuru baptisma rwnai Johon Judia hasing panthoro phawi
2. "Sumsok yakar di, Kaitorni haa sampakha !" hwnwi pirphai kha.
3. Johon wngkha Jisaia diari hai hwnwi sa langmani a borok se,
"Hasing panthoro khoroksa hai hwnwi chirikhokjak:
'Subraini bagwi lahar swnam di ;
bo himnani lamano kepleng khe ton di !' "
4. Johonni ri mangingang buikhumuni tak jak ; bo bukur bai bwchang khao, kukthora bai bolongni pia modu se bo chao.
5. Jerusalemni bororok bini thani phai kha, Judia angkor gwnangwi tei Jordan twimani ganaginini haa gwnangwini bororok bini thani phai kha.
6. Bohrok sak sakni sumsokno gosi kha, hake bo bohrokno Jordan twimano baptisma rwkha.
7. Johon kwbangma pharisai tei Sadukairokno bini thani baptisma wngna phaima nuk khe bo bohrokno hai hwnwi sakha, "Chibukni bosongrok, Kaitor yagul suna nai tongmani yakni kharwi yokdi hwnwi sabo norokno uansuk rwlang?
8. Norok sumsok yakar kha hwnwi sijak na twi khe tong d.
9. 'Abrahamno chini apha,' hwnwi saui norok yok anw abo kha ta ka di. Ang norokno o kok sao, Kaitor o holongroknibo Abrahamni bwsa tikhlai mano,
10. Buphang yaphango rua harjak ; bwthai kaham thai ya buphangno tanwi horo khiklai sokjaknai.
11. Norok sumsok yakar kha hwnwi ang norok no twi bai baptisma rwo ; tamo khe ani sai ulo phainai bo le norokno Phola Kwthar tei hor bai se baptisma rwnai. Bo ani sai kwplai kuk ; ang bini yaklap twinani suda se chuk ya.
12. Khamparni bebak gomno chokna bagwi baling bini yagono tongo ; bo gomno thumui gula da bainai, gundakno khe thwi phlai horo sogwi khibi bainai."
Jisu baptisma wngmani
( Mark 1.9-11 ; Luk 3.21-22 )
13. Aphuru Jisu Galilini Jordano thang kha, hake baptisma wngna hwnwi Johonni thani phai kha. 14. Johon bono kiphil rwna nai kha. "Ang se nwng bai baptisma wng thai bla ! Hai twtwi bahai khe nwng ani thani phai ?" hwnwi bo sakha.
15. Phiya Jisu bono hai hwnwi sakha, "Tabuk omo wng gra si thung, tamni hwn khe Kaitor nai ma twino chwng omo hai khenobma khlainai."
Hake Johon soi kha.
16. Jisu baptisma wng bai kheno twini kasa kha. Aphuru bini bagwi nokha phiyokjak kha, hake bo Kaitorni pholano pharuk hai khe birkhlai bini sago ba phaima nuk kha.
17. Aphuru chukno haani hai hwnwi saklaijak kha, "Omono ani khajani Sajla, ang bonono belai khe hamjakgo."
Jisu belokjakmani
( Mark 1.12-13 ; Luk 4.1-13 )
4. Aphuru phola Jisuno Soitan bai belok rwjakna hwnwi hasing panthoro tubu kha.
2. Nokha sal brwichi hor brwichi cha yaui tong khe Jisu okhuijak kha
3. Soitan bini thani phaiwi bono hai hwnwi sakha, "Nwng Kaitorni sajla khe o holong rokno ruti wng ridi."
4. Jisu hai hwnwi sa kha, " Elembago o kok tongo, 'Borok ruti bai simi thangwi maya, Kaitorni bukhukni bebak kok bai se thangnai."'
5. Aphuru Soitan Jisuno Taun Kwtharo twlangwi noktharni bosok kuchugo bacha rwi
6. bono hai hwnwi sakha, 'Nwng Kaitorni sajla khe hao bakhlai di ; tamni hwn khe Elembago o kok tongo,
Kaitor nini suarirokno nini bagwi dagi anw ;
nini yakung holong nang ya twi khe
bohrok nono yak bai yachak sok anw.' "
7. Jisu bono hai hwnwi sakha, " Elembago o kok no tongo, 'Nini Kaitor Subraino ta potali di.' "
8. Hake Soitan bono hatai kuchukma kaisao tlangwi swngcharni aswk haa bai jolma jolsarokno phunugwi
9. hai hwnwi sakha, "Nwng ano yasku sungwi khulum khe omorok bebaknono ang nono rw bainai."
10. Jisu hai hwnwi sakha, "Thang di Soitan ! Elembago o kok tongo, nini Kaitor Subraino simi se suriui khulum di.' "
11. Aphuru Soitan bono yakarwi thang kha, hake suarirok phaiwi Jisuno chuba phai kha.
Jisu Galilio samung khlai gramani
( Mark 1.14-15 ; Luk 4.14-15 )
12. Johonno jelo klai kha hwnwi khna khe Jisu Galilio thang kha.
13. Bo Nasareto tong yaui Sabulun bai Naptalini amchoio Galili lek rukungni Kapharnaumo thangwi tongwi kha.
14. Jisaia diari hai hwnwi sakha langmani abo nang phaina bagwi se omo wngo,
15. "O haa Subulun,
O haa Naptali,
twijlang bwkhak Jordanni ayang nar,
buini bororokni Galili !
16. Mwnakmao tongnairok bohrok belai pohor nuknai,
kwthwirokni haao mwnakmao tongnairok bohrokni aro pohor wngnai."
17. Aphuruni simi Jisu bini kok pirna cheng kha, Kaitorni haa sampa kha !"
Gabor khorokbrwino Jisu ringmani
( Mark 1.16-20 ; Luk 5.1.11 )
18. Jisu Galili lek rukungo himwi tong phuru gabor gabor takhuknwino leko chei buo tongma nuhur kha. A takhuknwi wngkha Simon bai Andria ( Simno no Pitorbo hwno ).
19. Jisu bohrokno hai hwnwi sakha, "Ani logi phai di, ang norokno norok romna phwrwng anw."
20. Logi logino bohrok chei yakarwi bini logi thang lai kha.
21. Thang te thang te bo tei takhuknwirokno nuhur kha, bohrok wngkha Sebedaini bwsarok Jakob bai Johon. Bohrok bupha Sebedai bai rungo chei swnamwi tong laio. Jisu bohrokno ring kha :
22. Logi logino bohrok rung bo kwlangwi buphano bo kwlangwi Jisuni logi thang lai kha.
Jisu phrwngmani, hamya ham rwmani
( Luk 6.17-19 )
23. Jisu Galili gwnangwi thang kha, thumnok rokgo phrwngwi kha, Kaitorni haani Kothoma kaham pirwi kha, bebak bemuk gwnang hamyarokno ham rwkha.
24. Bini kok haa Siria gwnangwi pirjak kha, aboni bagwi bororokb bini thani podrepot bemukrokno, podrepot hamyarokno tubu kha. Bohrok mwtai hamya kolopjakrokno, mirka gwnang rokno, yakung yak manya rokno tubu kha, hake Jisu bohrok bebaknono ham rw kha.
25. Galilini tei Taun Kaichini, Jerusalemni, Judiani tei Jordan ayang narni borok kwbangma bono rwkthar kha.
Hataio kasai Jisu Phwrwngmani
5. Jisu borok kwbangma nugui hataio kasa ka, bo aro achuk kha. Bini sagrirok bono chorsa khe kuthum kha,
2. Hake bo phrwngna chengsa kha.
Lama kaham
( Luk 6.20-23 )
3. "Kaitorni thani koi tongnairok
bohrok hamchajak ;
Kaitorni haa bohroknino !
4. "Khakamnairok
Bohrok khamchajak ;
Kaitor bohrokno kha
Kwchang rwnai !
5. "Kha sutrangrok
bohrok hamchajak ;
Kaitor rwna hwnmano
bohrok mannai !
6. "Kaitor naima twi simi tongna nainairok,
bohrok hamchajak ;
Kaitor bohrokno kha
kochom rw suknai !
7. "Buino maya chanairok
bohrok hamchajak ;
Kaitorbo bohrokno maya
maya chanai !
8. "Kha kuphurrok
bohrok hamchajak ;
bohrok kaitorno nuknai !
9. "Buino kwtha rwnairok
bohrok hamchajak ;
Kaitor bohrokno bini
bwsarok hwnnai !
10. "Kaitor naima twi tongwi
satokjaknairok
bohrok hamchajak ;
Kaitorni haa bohroknino !
11. "Norok ani borok wngma bai bui norokno lachi rw khe, norokno satok khe, norokno tatal khe kok hamya sa khe norok hamchajak.
12. Kha srang di, tongthok di, tamni hwn khe chukno hao norokni bagwi sokat kwbangma khati jak tongo. Norokni sai swkang tongnai diariroknobo bororok omo twi kheno satok kha."
Som bai Chati
( Mark 9.50 ; Luk 14.34-35 )
13. "Swngcharni thani norok som hai. phiya ba som pab ya wngwi thang khe abono pab rw phinani tei lama kwrwi. Abo mungsa samungo phano chukya, aboni bagwi khibiui rwjago, hake bororokbo kadului thango.
14. "Swngcharni thani norok chati hai. Hatai sakani tauno hui tonwi maya.
15. Khoroksa phano twk bai thuklubui tonna hwnwi chati phwnang ya ; tamo khe thopna sakano tono, hake nokni bebak bororok pohor nugo.
16. Omo twi kheno bororokni thani norokni chati ma chwng thai, hake norok samung kaham khlaimano nuguj nohrok chuknohao norokni phano ma lop anw."
Kerongni kokno twwi phrwngmani
17. "Ang Musini Kerong bai diarirok phrwngmarokno swkwmana phaio hwnwi kha ta ka di. Ang swkwmana phai ya. a phrwngmarokno samungo phwnangna se phaio.
18. O kokno muitu narwk di, haa bai nokha tong sak Kerongni kok thaisa laisa phano kwmai thang gwlak bebak pai suk ya sakno tong anw.
19. Hake Kerongni kok kisa phano rakhok yai buinobo abo haino tongna phrwngnai borok bo Kaitorni haao jotoni sai kotoi wngnai. Phiya ba Kerong rakhokgwi buino bo abo haino tongna pbrwngnai borok no Kaitorni hao kotor wngnai.
20. Ang norokno o kok sao, Kerong phrwngnairok bai Pharisairokni sai kaham khe Kaitor naima twi tong khe simi se norok Kaitorni hao habwi man anw."
Jolimani kokno twwi phrwngmani
21. " 'Borok ta bwthar di ; borok bwtharnai bo buj thumjak anw,' hwnwi agini bororok sajakmani o kokno norok khna kha.
22. Phiya ba ang norokno o kok sao, takhukno jolijaknai borok no buj thumjak anw ; takhukno 'Natha' hwnnai borok bo Kaunsil bwskango tubujak anw ; phiya takhukno 'Bepotar' hwnnai borok bo morkeni horo khiklaijakna bagwi birman nang anw.
23. Aboni bagwi nwng Kaitorni hayao barokna phuru nini bebailo nini takhukni kok tongo hwnwi muitu man khe
24. a barokmano hayaono klangwi nini takhuk bai kwthai gra di ; hake kiphilwi phai Kaitorno barok phai di.
25. "Khoroksa swk phano nini mungwi kuto kes phwnang khe kuto thangya sinino bo bai kwthai pai di ; kuto thang khe bo nono jojni yago yapharnai, joj police ni yago nono yapharnai, hake nwng jelo chopjaknai.
26. Ang nono o kok sao, lepsa kwrwi twi jurbanda rw bai ya sak nwng aro ma tongnai."
Lupchani kok
27. "Sinal-chuta ta wng di,' hwnwi sajakmani o kokno norok khna kha.
28. Phiya ba ang norokno o kok sao, bwrwi khoroksano phano nugui sak tangna muchungnai norok bo kha bising bising lupcha wngma klaio.
29. Aboni bagwi nini yagrani mokol nono sumsogo khiklai khe abono ekhregwi khibi di. Nini bebak bwsak morkeo khiklaijakmani sai bwsak khaksa kwma phano ham kugo.
30. Nini yagra yak nono sumsogo khiklai khe abono tansui khibi di. Nini bebak bwsak morkeo khiklaijakmani sai bwsak khaksa kwma phano ham kugo."
Kak laimani kok
( Mathai 19.9 ; Mark 10.11-12 ; Luk 16.18 )
31. " 'Khoroksa swk bini bihikno kak khe kaksen swi ma rwnai,' hwnwi sajakmani o kok bo tongo.
32. Phiya ba ang norokno o kok sao, sinal wngya phano khoroksa swk hikno kak khe, phiya a bwrwi tei khoroksa no kaijak khe, hake a chwla a bwrwi sinal khlai ma klaio ; phiya a kak jak bwrwi no nanai borok bobo lupcha.'
Swmai tangmani kok
33. '" Nwng swmai ta swbai di, tamo khe Kaitorni thani swmai tangmani haino khlai di ; hwnwi agini borok sajakmani o kokno norok khna kha.
34. Phiya ba ang norok no o kok sao, norok o kok rw phuru swmai ta tang di ; chuknohani mungwi ta tang di, abo Kaitorni acghuk thai ;
35. Hano romwi buya, abo bini yakung boksa jaknai ; Jerusalemni mungwi buya, abo bugra Kaitorni taun.
36. Nini khorokno romwi bo swmai ta tang di, tamoni hwnkhe bwkhnai tangsano phano nwng kuphurbo khlai maya, kosombo khlai maya.
37. 'I' khe 'I' hwn di, 'Ihe" khe 'Ihe" hwndi, aboni sai bara wng khe abo soitanni aroni ongkhorma se."
Yagul su lai phimani kok
(Luk 6.29-30)
38. ''' ' Mokolni bodla mokol, bua ni bodla bua,' hwnwi sajakmani o kokno norok khna kha.
39. Phiya ba ang norokno o kok sao, nini hamya khlai nai borokno yagul ta su phi di. Khoroksa swk nono yagra khangaro thapra rwkhe yaksi khangaro chagwi rw phi di.
40. Khoroksa swk nini kamchwlwini bagwi kes phnang khe nini dulainobo bono ahaino rwi rw di.
41. Khoroksa swk nono bini poja juraboli khe mail kaisa twi di hwnkhe tei mail kaisa ahaino twi d.
42. Khoroksa swk bini thani mungsa swk san khe bono abono rw di ; khoroksa swk solok nai khe bono abono rw di."
Arirokno hamjak di
(Luk 6.27-28, 32-36)
43. " 'Nini borokno hamjak di, arirokno naisle di ,' hwnwi sajakmani o kokno norok khna kha.
44. Phiya ba ang norokno o kok sao, norokni arirokno hamjak di, norokni hamya khlainai rokni bagwi surisan di.
45. Hake norokno chuknohani norokni Phani sajla wngnai, tamni hwnkhe bo bini satungno borok kahamnobo rwo, brork hamyanobo rwo ; phiya kaham khlainainobo uatwi rwo, hamya khlainainobo rwo.
46. Norokno hamjaknai rokno simi norok hamjak khe Kaitor tamo wngwi norokno sokat rwnai. Teks romnai rokbo abotwi hamjaklai bla !
47. Norokni bororok bai simi kok salai khe buini sai kwbang tamo khlaima klai ? Tei buirokbo abo twi basalai gwlak !
48. Chuknohani norokni Pha kaham wngtwi norok bo katswibo haino kaham wng di
. '
Samung kahamni kok
6. '" Hus wng di, bui nukna twi norok lukuni bwsango samung kaham ta khlai di. Norok abohai khlai khe chuknohani norok ni Phani aroni mungsa phano sokat mangwlak.
2. "Aboni bagwi phatrarok thumnokrogo tei lama rokgo khlai twi kwrwi rokno rwphuru nwng dul ta bu di. Bororok bohrokno kaham hwn anw hwnwi se bohrok abo khlaio. O kokno muitu narak d, bohrok sokat manwi pai kha.
3. Tamo khenwng kwrwino rw phuru nini yagra yak tamo khlai nini yaksi yak suda sai ta man rw di.
4. Hake omo tepsa khe khlai jaknai se. Hake nwng tepsa khe khlai mano nuknai Nwpha nono sokat rwnai."
Surisanni kok
(Luk 11.2-4)
5. "Nwng surisan phura khe phatrarok hai ta wng di. Bui nuk thung hwnwi bohrok thumnokrogo tei lama buprarogo bachai surisanna hamjakgo. O kokno muitu nara di,bohrok sokat manwi pai kha.
6. Nwng surisan phuru khe nini nuk bisingo habwi dugar soui nukjakya Nwphani thani surisan di. Hake nwng tepsa khe khlai mano nuknai Nwpha nono sokat rwnai.
7. "Norok surisan phuru bui satwi kok nangya kwbangma ta sa di. Bohrok tangma tangsa surisanma bai Kaitor khna anw hwnwi bohrok kha kao.
8. Bohrok hai ta wng di ; norok sanya sini no norokni tamo nang nangya abo norokni Pha sai mano.
9. Aboni bagwi norok omo twi khe surisan di ;
Chuknohani O chini Apha,
nini mung kwthar surijak thung ;
10. Nini ha phai thung ;
nini muchung twi
chuknohao wngma hai
o haobo ahaino wng thung.
11. Tinini nangmani chamung
chwngno rw di.
12. Bui chini hamya khlai mano chwng nakar twi
nwng bo chwng hamya khlai mano nakar di.
13. Chwngno belai khe ta amjok di,
phiya Hamyani yakni kati rw di ;
14. "Bui norokni hamya khlai mano norok nakar khe chuknohani norok ni Phabo norok no nakar nai.
15. Phiya bui hamya khlai mano norok nakarya khe chuknohani norokni Pha bo norok hamya khlai mano nakar gwlak ;
Ubasni kok
16. "Norok Ubas tong phuru phatrarok tong twi mukhang mokjak khe ta tong di. Bohrok ubas tongo hwnwi bui sai man na twi khe bohrok mukhang kosom khe tongo. O kokno muitu narak di, bohrok sokat manwi pai kha.
17. Nwng ubas tong phuru mukhang su di, bwkhnaio thokphul di ;
18. hake nwng ubas tongo hwnwi bui sai man gwlak nukjak ya Nwpha simi sai man anw. Hake nwng tepsa khe khlai mano nuknai Nwpha nono sokat rwnai."
Chuknohao se khati hor di
(Luk 12.33-34)
19. "Norok o swngcharo rang-ri ta khati di, oro kurumabo khuntio, sorbo khio, sikokbo habwi khokgo.
20. Aboni sai chuknohao se rang-ri khati hor di, Aro kurumabo khuntia,sorbo khia,sikokbo habwi khokgwi manya.
21. Tamoni hwn khe rang-ri tong thanino norokni bwkhabo tongo."
Bwsakni chati
(Luk 11.34-36)
22. "Mokol wngkha bwsakni chati. Nini naisikma kepleng khe bwsak gwnangwi chwngnai ;
23. Phiya nini naisikma bejua khe bwsak mwnaknai. Abo baio nini bisingni pohor chwngya khe abo bwswk kirima singcha mwnakno !"
Kaitorni thani kha bera di
(Luk 16.13 ; 12.22-31)
24. "Khoroksa phano nokphang khoroknwini seleng khati manya ; bo koroksano naisle khe tei khoroksano hamjaknai, eba khe khoroksano kha suk khe tei khoroksano samung nangjak gwlak. Nwng Kaitorni seleng khati twtwi rang-ri ni seleng khati manya..
25. "Aboni bagwino ang norokno o kok sao, tamono chaui nungwi thangnai hwnwi ta uanadi, phiya tamono kannai, tamono chmnai hwnwi bo ta uana di. Samungni sai langma torkukya diba ? Phiya ri-chumni sai bwsak torkukya diba ?
26. Nokhani toksa toktwi rokno nahar di : bohrok mai bo sarya, rabo ra ya,gula bo daya ; chuknohani norokni Pha bohrokno na tongo. Norok toksa-toktwi rokni sai torkukya diba?
27. Norok ni bere sabo wansukgwi ayukni bara tei salsa swk thangwi mannai tong?
28. "Ri-chumni bagwi tamoni wana ? Khumrok bahai tor lok nahar di ; bohrok samungbo tangya, ribo takya.29. Hai phano ang norokno o kok sao, Solomon jolma jolsa gwnang phano omorokni barsani sai se aswk naithokgwi man lang ya.
30. Charani jabra -tini tong khe khwna kwrwi,thapao sokjaknai-abono se Kaitor aswk naithok rwi ton khe bo norokno naithok rigwlak diba? Norok bwswkbse poito kisa gwja !
31. Abo baino tamo no chanai, tamnono nwngnai,tamono kannai chumnai abono ta wana di.
32. ( Poito kwrwirekno omorokno manna naio. ) Omorok bebak norokni samung nango hwnwi chuknohani norokni Pha sai mano.
33. Tamo khe bini ha ni bagwi se wansuk gra di, bo naima twino tongna bagwi se wansuk gra di ; hake bo norokno aswk manwi rokno rw anw.
34. Aabo bai no khwnani bagwi ta wana di khwnani khwna wansukjak anw. Tini tangmani tinini wngo."
Buino majra ta ber di
( Luk 6. 37-38, 41-42 )
7. "Kaitor norokno majra ber ya twi khe norok buino majra ta ber di,
2. tamoni hwnkhe norok buino majra ber twi no Kaitorbo norokno majra ber nai. Norok buino khwlai twino Kaitorbo norokno abo hai khlainai.
3. Hake tamoni nini takhukni mokolo buphang biphiring tongma simi nwng nuk ? Nini mokolni buphang bokocho le tamoni nuk ya sla ?
4. Nini mokolo buphang bokocho tong twtwi nwng bahai khe nini takhukno 'Phai di, nini mokolni buphang biphiring tikhlai gra na, ' hwnwi sarak de ?
5. O phatra, nini mokolni buphang bokocho tikhlai gra di, hake nini takhukni buphang biphiring kaham khe nuk anw ; aphuru nwng tikhlai man anw.
6. "Swirokno manwi kwtharno ta rwdi-rw khe bohrok kiphilwi se norokno riphirik phir anw ; norokni muktanobo wakrokni bwskango ta rw di-rw khe bohrok abohrokno ka simi se kadul anw."
San di,naituk di, dugar bu di
( Luk 11.9-13 )
7. "San di, norok mannai ; naituk di, hake norok nuknai ; dugar bu di, hakke norok phiyokgwi rwjak nai.
8. Tamon hwnkhe sannai borokbo mano, naitoknai borokbo nugo, dugar bunai borokbo phiyokgwi rwjakgo.
9. Bwsa ruti san khe holongsiki rwnai abo twi bupha norokni bisingo sabo tong ?
10. Eba khe a san khe chibuk rwnai sabo tong ?
11. Norok aswk hamya twtwi se norokni bwsarokno manwi kahano rwna siui tongo. Hake chuknohani norokni Phani thani sannairokno bo manwi kaham rwnai o kok bwswk se kubui !
12. "Norok bui bai khlaijakna muchung twi norokbo buino khlai di : o kok khe Musini Kerong bai diarirok phrwngmma kok se."
Dugar kesep
( Luk 13.24 )
13. "Dugar kesep twi hab di, tamoni hwn khe morke lamani dugar wng kha kuar, lamabo kotor, hake borok kwbangmano abo twi himo.
14. Thangnani lamani dugar wng kha kesep, lamabo kutuk, hake kisa bororokno abono sai mano."
Bwthai baino buphang sinijago
( Luk 6. 43-44 )
15. "Diari phatrarok bai hus khe tong di ; bohrok saka saka mera hai khe norokni thani phaio, phiya kha bisingo le bohrok thamchi kutung geguma hai se.
16. Bohrokni samung baino noro bohrokno sini anw. Busulwngo angur thai ya, raisoklwngobo khwichang thai ya.
17. Buphang kaham bwthai kaham thaio, buphang hamyabo bwthai hamya thaio.
18. Buphang kaham khe bwthai hamya thai man ya ; buphang hamyabo bwthai kaham thai man ya.
19. Bwthai kaham thai ya buphang khe tanwi horo khiklai sokjago.
20. Hake abo baino norokbo diari phatrarokno bohrokni samung bai no sini anw."
Ang norokno si se sini ya
( Luk 13. 25-27 )
21. "Ano subrai,Subrai !' hwnnairok bohrok bebakno Kairotni hao habwi manglak tamo khe chuknohani Aphani muchung twi tongnairok simi se habwi man anw.
22. A salo borok kwbangmano ano hai hwnwi hwn anw, 'Subrai, Subrai ! Nini mungwi chwng Kaitorni kok sakha, nini mung bai chwng mwtai hamya kwbangmano brwkhlai kha, nini mung bai wanama singcha samung kwbangmano khlai kha !'
23. Ang aphuru khe bohrokno hai hwnwi sa anw, 'Ang norokno si se sini ya. Ani oroni thang di,chengtarok !' "
Nok tangnai khoroknwirok
( Luk 6. 47-49 )
24. "Hake tabuk, ani o kokrok khaui abo haino tongnai borok bo holongdap saka nok tangnai sian kwrwng borok hai.
25. Uatwi lukhlai kha, twisa rokbo phai kha, hai phano a nok bai liya, abo holongdap saka tangjak.
26. "Phiya ani o kokrok khnaui abo hai tongya borok bo hasingcha saka nok tangnai sian kwrwi borok hai.
27. Uatwi lukhlai kha, twisarokbo lom kha, nobar kotobo phai kha. A nok baimani bwswk kha korom rere."
Jisu suar gwnang khe phrwngo
28. Jisu omorokno sa bai khe lukurok bo phrwngmano uana jak kha.
29. Bo bohrokni Kerong phrwngnairok hai phrwngya, suar gwnang khe se phrwngo.
Biadi chajakno Jisu ham rwmani
( Mark 1. 40-45 ; Luk 5. 12-16 )
8. Jisu hataini ongkhorwi phai khe luku kwbangma bono rwkthar kha.
2. Aphuru biadi chajak khoroksa bini thani phai yasku sungwi hai hwnwi sa kha, "Hodasa, nwng ano ham rwna khe ham rwi mano."
3. Jisu yak phologwi bono tangwi "Ham di, ang naio," hwnwi sa kha. Hai klheno doropsa bini biadi ham kha.
4. JIsu bono hai hwnwi sa kha, "Khna di, o kokno kebono ta sadi. Thang di, ochaino thangwi phunugwi di. Nwng tabuk ham kha hwnwi lukuno phunukna bagwi Musi rathar di hwnwi dagima haino ratharwi di,"
Romni sengkrak okrani selengno Jisu ham rwmani
( Luk 7. 1-10 )
5. Jisu kapharnaumo hab khe Rumni sengkra okra khoroksa bo bai malai bono hai hwnwi koi kha,
6. "Hodasa ani seleng nogo Hamya kwlai jak, kisa phano bachai man ya belai khe kwlai tong kha."
7. "Ang thangwi bono ham rwi anw," hwnwi Jisu sa kha.
8. Sengkrak okra hai hwnwi sa kha, "Ihi, hodasa, ani nogo nono kasa rwna chuk ya. Nwng hwn kheno ani seleng ham anw.
9. Angbo bokhorok khoroksani yago, ani yagobo sengkrak tongo. Ang khoroksano 'Thang di !' hwn khe bo thango, tei khoroksano 'Phai di !' hwn khe bo phai o, ani selengnobo 'Omono khwlai di !' hwn khe bo abono khwlaio.'
10. O kok khwnaui Jisu uanajjak kha, bono rwktharnairokno bo hai hwnwi sa kha, "Norokno ang o kok sao' Israilrokni bisingo phano bo hai poito gwnang borok ang nuk ya kho.
11. Ang norokno o kok sao, borok kwbangma sal kabaini sal thangbaini phawi Kaitorni hao Abraham Isak tei Jakob bai baksa achugwi cha lai anw ;
12. a hao tongna hwnnairok khe phatarni mwnakmao khiklai rwjak anw."
13. Hake Jisu sengkrak okrano hai hwnwi sa kha, "Nogo thang di, nwng poito khwlai twino nini bagwi khwlaijak anw."
Hake a sengkrak okrani seleng aphuruno ham kha.
Borok kwbangmano Jisu ham rwmani
( Mark 1.29-34 ; Luk 4.38-41 )
14. Jisu Pitorni nogo thang kha, bo aro pitorni bwkrajwkno lumui klai tongma nuk kha.
15. Bo bini yak tang kha ; hake bo bachaui bono char rwkha khan rwkha.
16. Sanja klai kheno bororok mwwtai hamya kolopjakrok kwbangmano Jisuni thani tubu kha. Hake Jisu kok thaisa baino mwtai hamya rokn rwkhlai kha,bebak hamya roknobo ham rwkha.
17. Bo sakphangno chini hamyano hor kha, chini bemukrok rujui twlang kha, hwnwi Jisaia diari sa langmani abo nang phaina bagwi se omo wngo.
Jisuni logi tongna nainairok
( Luk 9.57-62 )
18. Jisu luku kwbangmano bono chorsa khe kuthumma nugwi bini sagri rokno lekni ayangnaro thangna hwnwi dagi kha.
19. Kerong phrwngnai khoroksa bini thani phawi hai hwnwi sa kha, "Hodakra, nwng thang thanio ang thangna gosio."
20. Jisu bono hai hwnwi sa kha, "Sialni hakor tongo, toksa- toktwirokni bothop tongo, Borokni Sajlani le kwrwngsa phano bokhorok bomna se kwrwi."
21. Tei khroksa sagri hai hwnwi sa kha, "Hodakra, swkang aphano phobwi rwi grana,"
22. Jisu hai hwnwi sa kha, " Nwng ani logi phai di, kwthwi bai kwthwino phob lai thung."
Jisu nobar kotor thak rwmani
( Mark 4.35-41 ; Luk 8.22-25 )
23. Jisu rungo ka kha, bini sagrirokbo bini logi thang kha.
24. Achomsa leko nobar kotor sibcha khe rungo twi aphal pung phai kha. Aphuru Jisu thui tongo,
25. Sagri rok bini thani thangwi bono socha lai "Subrai, chwngno mwthang di, chwng thwina nai tong lai kha !" hwnw sa kha.
26. "Norok tamoni bagwi aswk kirijak ? Norokni poito tamoswk kisa gwja !" hwnwi Jisu hwn kha. Hake bo bachaui nobar bai twino damrogwi rwkheno bebak kwchag kwchang wng kha.
27. Bebakno buanajakbai kha. "Omo bubo twi borok hwno ? Nobar rok bai twirok suda bini kok khnai ma tongo !" hwnwi bohrok salai kha.
Jisu mwtai hamya kolopjak khoroknwino ham rwmani
(Mark 5.1-20 ; Luk 8. 26.39 )
28. Jisu lek ayang narni Gadara amchoio phai khe simalwngni ongkhorwi phainai borok khoroknwi bini thani sok phai kha. Bohrok mwtai hamya kolopjak, bohrok belai kirimasingcha, aboni bagwi khoroksa phano a lama twi himrakya.
29. Logi logi no bohrok hai hwnwi chirikhok kha. "O Kaitorni sajla, nwng chwng bai tamo nangjak ? Mol sokphai ya sini no da nwng chwngo satokna phai ?"
30. Aro wak kwbangma ada chai tong mani, abo bai kwbang chal thaya
31. "Nwng chwgno rwkhwlaina khe u wak dolo chwngno rohor jadi," hwnwi mwtai hamya rok Jisuno koi kha.
32. "Thang di," hwnwi Jisu bohrokno hwnkha. Hake bohrok ongkhorwi wak rokni bisingo thangwi habwi kha. Hake aswk wak bebakno harwbra twi ongkhor klaiwi leko kwlwkgwi thwi bai kha.
33. Wak mwrwknairok kharwi tauno thang lai kha, hake bebak kokno khupurwi sai bai kha, a mwtai hamya kolopjak rok tamo wng kha a kokno bo sai bai kha.
34. Aboni bagwi taunni masa krwitwi Jisu bai malai na hwnwi thang kha. Bohrok bo bai malai khe bono norokni amchoini ongkhorwi thang di hwnwi koi kha.
Yakung yak manyano Jisu ham rwmani
( Mark 2. 1-12 ; Luk 5. 17-26 )
9. Jisu rungo kasai lek lawi bini tauno kiphilwi phai kha.
2. Borok maknwi maktham wayingo khe yakun yak manya khoroksano balwi bini thani tubui phai kha. Bohrok aswk poito khwlai mano nukgwi Jisu a yakung yak maya no "Ta wana di, chwlasa. Nini sumsok nakar jak kha." hwnwi sa kha.
3. Hake kerong phrwngnairok baksa kha bising bising hai hwnwi wansuk lai kha, "O borok ba Kaitorno se hamya sa bla !"
4. Bohrok wansukma kok no Jisu sai manwi hai hwnwi sa kha, "Tamo wngwi norok omo hai kok hamya wansuk lai ?
5. 'Nini sumsok nakarjak kha,' hwnwi sana da lai kuk, eba khe 'Bachai him gra di,' hwnwi sana da lai kuk ?
6. Hake o swngcharo borokni Sajla sumsok nakarwi mano abono ang norokno phunuk anw." Hake Jisu a yakung yak manyano "Bacha di, nini uaing khochai nogo thang di !" hwnwi sa kha.
7. A borok bachai nogo thang kha.
8. Abono nugui bororok kirijak bai kha, Kaitor bororokno omo twi phan rwma bai bohrok Kaitorno lob lai kha.
Jisu Mathaino ringmani
( Mark 2. 1-17 ; Luk 5. 27-32 )
9. Jisu aroni kutulwi thang kha, hake him te him te Mathai hwnwi teks romnai khoroksano bini ophicho achugwi tongma nugwi kha. "Ani logi phai di, " hwnwi Jisu bono sa kha.
Hake Mathai bwchaui bini logi thang kha.
10. Mathaini nogo Jisu maichai tong phuru teks romnairok bai basijak borok kwbangma bo bai tei bini sagrirok bai baksa cha thani achuk phai kha.
11. Maknwi maktham Pharisairok abono nugwi bini sagrirokno hai hwnwi swng kha, "Norokni Hodakra tamo wngwi teks romnairok bai tei basijakrok bai chalai nwnglai klai sala ?"
12. Jisu bohrokni kok khnaui hai hwnwi sa kha, "Kahamni doctor nangya, hamyani se nango.
13. 'Ang pun tok nai ya, Khairokma se naio, 'hwnwi Elembakni o kok tamo hwnwi sa kha thangwi nai di. Borom gwnangrokno ang ringna phai ya, basijakrokno se ringna phaio."
Ubasni kok swngmani
( Mark 2. 18-22 ; Luk 5. 33-39 )
14. Aphuru baptisma rwnai Johonni sagrirok phaiwi Jisuno hai hwnwi swng kha, "Chwng bai pharisairok ba tamo wngwi ubas tong tong lai sla ? Nini sagrirok le kisa phano tong ya sla ?"
15. isu hai hwnwi sa kha, "Kaijaknaisa logi tong twtwi kailabari phainai rok mogwi tong anw hwnwi da norok kha ka ? Ihi, ahai ya ! Tamo khe omo twi sal phai anw, kaijaknaisa bohrok bai swkagwi twlangjak anw, aphuru khe bohrok cha yaui ma tong anw.
16. 'Ri kwchamo khoroksa phano ri kwtal thab ya ; omo twi khe thabmani abo ri kwchamno teibo kichik rwi bwlam war rwnai.
17. Eba khe khoroksa phano angur bwtwi kwtalno twk mosonjago ton ya ; ton khe a twk rechek rachak wngnai, hake bwtwi bo kwsarnai, twkbo bainai. Tmo khe angur bwtwi kwtalno twk kwtalono tono, hake kwnwi nwino kaham tong anw."
Hodani bwsajwk bai Jisuni dulai tangnaijwk
( Mark 5. 21-43 ; Luk 8. 40-56 )
18. Jisu o kokno bohrokno sai tong phuru hoda khoroksa phawi yasku sungwi hai hwnwi sa kha, "Angsajwk tabukno thwi drop. Phai di, nwng bini sago yak bera kheno bo thangsanai."
19. Hake Jisu bachaui bini logi thang kha, bini sagrirokbo bo bai baksa thang kha.
20. Bwrwima khoroksa nokha bisi chiknwi wng kha ri suma thak ya, bo uklok twi phawi Jisuni dulai buchuk tangwi rw phai kha.
21. "Ang bini dulai buchuk tang kheno hamnai." hwhwi bo kha bising bising wansuk kha.
22. Jisu uphilwi bono naisingwi hai hwnwi sa kha, "Bwrwima ta wana di. Nini poito nono ham rwkha." Aphuruno a bwrwima ham kha.
23. Hake Jisui a hodani nogo thang kha. Kwthwini tamnairokno tei bebak borokno kutuk lai jak nugwi
24. bo hai hwnwi sa kha, "Jotono ongkhorwi thang bai di ! O cherai thwi ya - bo thui swe tongo !"
Bui bebakno bono mwnwi bai kha.
25. A bororokno tikhlai rw bai kheno a cherai tongma nogo Jisu habwi bini yak romwi kha, hai kheno a cherai bwcha kha.
26. O kok a ha gwnangwi pirjak kha.
Mokol phula khoroknwino Jisu nuk rwmani
27. Jisu aroni kutulwi thang kha, hake himwi tong phuru mokol phula khoroknwi bono rwkthar lai kha. "O Daudni Bwsla, chwngno khairok jabadi !" hwnwi bohrok chirik lai kha.
28. Jisu nogo thang kheno a mokol phula khoroknwino bini thani phai kha. "Ang omo hai khlai mano hwnwi norok poito da thang ?" hwnwi Jisu bohrokno swng kha.
"I, poito thango, hodasa," hwnwi bohrok sa kha.
29. Jisu aphuru khe bohrokni mokol tangwi "Norok poito thang twino wng thwng ! hwnwi sab kha,
30. hake bohrok mokol nuk kha. "O kokno khoroksano phano ta sa di," hwnwi Jisu bohrokno ragdama khe sa kha.
31. Bohrok thangwi Jisuni kok a ha gwnagwi pir kha.
Kok manya khoroksano Jisu ham rwmani
32. A borok khoroknwirok thang kheno maknwi maktham bororok mwtai hamya kolopjak kok man ya khoroksano Jisu ni thani tubu lai kha.
33. A mwtai hamya rw khlai jak kheno a borok kok sacha kha. Jotono wanajak bai kha. "Israilrokni bisingo omo hai chwng nukya kho," hwnwi bohrok sa lai kha.
34. Pharisairok khe "Mwtai hamyarokni bokhorok bai se bo mwtai hamyarokno rwkhlaio," hwnwi sa lai kha
Jisu lukuno hamjak mani
35. Jisu taunrokgo kami rogo thang kha. Bo bohrokni thumnokrogo bo phwrwng kha, Kaitorni hani kothoma kahambo pir kha, bebak bemuk gwnang hamya rokno bo ham rw kha.
36. Bo luku rokno nugwi belai khairokjak kha, tamoni hwnkhe mwrwknai kwrwi mera rok hai bohrok khairok susuk , piring poroi gwja.
37. Abo baino bo bini sagrirokno hai hwnwi sa kha, "Mai kwbangma munui tong kha, yang ranai se bang ya.
38. Abo baino bini ma rana bagwi 'Teibo borok rohor di,' hwnwi nophngsano san di."
Jisuni chonghor chiknwirok
( Mark 3.13-19 ; Luk 6. 12-16 )
10. Jisu bini sagri chiknwirokno kwrwngsa khe ringwi mwtai hamyarok rwkhlainani bai bebak bemuk gwnang hamyarokno ham rwnani phan rw kha.
2. Omorok wng kha a sagri chiknwirokni bumung : swkang Simon ( bono Pitor hwno ) tei bini takhuk Andria ; Jakob bai bini takhuk Johon, bohrok wng kha Sebedaini bwsarok ;
3. Philip tei Bartholomai, Thoma teks romnai Mathai ; Alphaini bwsla Jakob tei Thadia ;
4. Kwsrang Simon, hwn khe Jisuno romrwnai Juda Iskariot.
Chonghor chiknwirokno pirna rohor mani
( Mark 6. 7-13 ; Luk 9. 1-6 )
5. Jisu o chiknwrokno hai hwnwi sai rohor kha, "Buini bororokni hao tei Samariarokni taun khungsao phano ta thang di,
6. mera kwmajak hai Israirokni thani se thang di.
7. Kaitorni ha sampa kha hwnwi thangwi pirwi di.
8. Ham ya no ham rw di, kwthwino mwthangwi di, biadi chajakno ham rw di, mwtai hamyano rwkhlai di. Norok magna manmani, magnano rwdi.
9. Nini solao mungsa phano ta twi di, rangchak buya, rukphai buya, tamani rang buya ;
10. lamani bagwi bogol ta twi di, kamchwlwi kangsani bara ta twi di, yaklapbo ta twi di, raidang bo ta twi di. Samung tangnaisa bini chamung man thai klaio,
11. 'Norok taun khungsa swgo kami khungsa swgo sok phai khe aro habwi norokno nogo kasa rwna muchungnai abo twi borokno naituk di, hake aroni kutul ya sak a borok bai tong di.
12. Norok noksingo ma hab khe 'Kha kwchang di.' hwnwi hwn di.
13. A nokni bororok norokno yachak sok khe norok 'Kha kwchang di,' hwnmani a kok nang thung.
14. Phiya noksa swk phano taun khungsa swk phano norokno nogobo kwsa rwya khe, norokni kokbo khna ya khe, hake yakungni hadlwi buprai klangwi aroni thang di.
15. O kokno muitu narwk di, Jerani salo a taunni bororokni sai sodom bai Gumrani bororokno Kaitpr maya cha kuk anw."
Satokjaknani kok
( Mark 13. 9-13 ; Luk 21. 12-17 )
16. "Khna di, ang norok no geguma kholao merano rohor twi se rohoro. Norok chibuk hai hus gwnang wng di, pharuk hai kwchang kwchang wng di.
17. Hus khe tong di, bororok norokno khaui kuto twlang anw, thumnokrogo norokno swprak anw.
18. Gobor norrok bai bugrarok tei buini bororokno kothoma kaham sana bagwi norok gobornorrok bai bugrarokni bwskango ani bagwi buj thumna tubu jak anw.
19. Norok buj thumjak phuru tamono sanai bahai khe sanai abono ta wana di ; aphuru norok tamo sanai abo norokno sai rwjak anw.
20. Tamoni hwnkhe norok samani kok abo norok sagwlak ; abo norokni Phani Phola se norokni khuk twi sanai.
21. "Takhuk takhukno butharna bagwi rom rwi rohor anw, buphabo haino bwsano khlai anw ; bwsa-bwtwirokbo buma buphani ari wngwi bohrokno butharna rohor anw.
22. Ani bagwi bebak borok norokno naisle anw, tamo khe soi man suknai borok bo se mwwthangjaknai.
23. Bohrok taun khungsa swgo norokno satok khe tei khungsao kharwi thang di. Ang norokno o kok sao, Israilni bebak taunno norok samung khlai bai ya sinino Borokni Sajla Phainai,
24. "Phrwngnaini sai srwngnai tor ya ; selengbo nokphangni sai tor ya.
25. Abo baino srwngnaibo phrwngnai bai baksa wng kheno, selengbo nokphang bai baksa wng kheno kha kochom thai klaio. Nokphang Belsebul hwnjak khe bini nokni bororokbo bwswk se hamya hwnjak no !'
No comments:
Post a Comment